Шымкентте екі қолға бір күрек іздеп, еден жуушы боп жұмысқа тұрғысы келген тұрғын 250 мың теңгесінен айырылды. Жәбірленушінің айтуынша, 31 жастағы азаматша қаламыздағы денсаулық сақтау мекемелерінің біріне еден жуушы етіп жұмысқа орналастырып беремін деп уәдені үйіп-төккен. Ол қызметі үшін алдын-ала сыйақы ретінде ақшасын алып, алдап кеткен. Оқиға Шымкент қаласында орын алды. Алайда алаяқ сол күйі уәдесін орындамай, ақшасын да қайтармай қойған.
Қалалық Полиция департаменінің мәліметінше, аталған дерек Қылмыстық кодекстің 190-бабы 1-бөлігімен (Алаяқтық) сотқа дейінгі тергеп-тексерудің бірыңғай тізіліміне тіркелді.
«Криминалдық полиция бөлімінің қызметкерлері күдіктінің жеке-басын анықтауға бағытталған жедел іздестіру жұмыстарын жүргізді. Нәтижесінде жергілікті жердің тұрғыны анықталды. Жасы – 31-де, жұмыссыз. Бұған дейін алаяқтық жасағаны қылмыстық жауапкершілікке тартылып, сотты болған. Тергеу амалдары жүргізілуде» деп атап өтті полициядан.
Қазіргі кезде күдікті уақытша ұстау изоляторында қамауға алынды.
