Шаңырақ көтергендеріне жарты ғасыр уақыт болған ата мен әжей алтын тойларын дүркіретіп атап өтті. Салтанатты кешті ұйымдастырушылар тойдың видеосын ТікТок парақшасында жариялады. Онда қалыңдық пен күйеу жігіттің киімін киген ерлі-зайыптылар тойхана алдына лимузинмен келеді. Той ғимаратына кірген сәтте «Жар-жар» әні орындалып, үлкендер шашу шашады. Ең қызығы, алтын той иелері қыз жолдас пен күйеу жолдасты да ұмытпаған. Бұдан өзге тойда ерлі-зайыптылар торт кесіп, ал АХАТ қызметкері оларды қуанышты сәттерімен құттықтайды. Той ортасында ақ көйлек киген әжей құрбыларына қалыңдық гүлін лақтырады.
Видеоны жариялаған автордың мәліметінше, ата мен әжейдің балалары ата-анасына заманауи стильдегі той жасап берген. Олар 50 жылдан соң қайта үйленгендей әсер алған.
Тойдағы бейнежазбаны көрген желі қолданушылары той иелеріне тәнті болып, ұзақ ғұмыр тіледі. Басым көпшілігі балаларының ата-анасына жасаған сыйына риза болды.
