Алматыда 21 жасар жігіт автотұрақтағы көліктердің мемлекеттік нөмірлерін ұрлап, пайда табуды кәсіпке айналдырған. Полицейлердің дерегінше, күдікті мемлекеттік тіркеу нөмірлік белгілерін шешіп алып, кейін оны иесіне ақы төлеген жағдайда ғана қайтарып берген.
«Түнде ол тұрақта тұрған көліктердің мемлекеттік нөмірлерін шешіп алып, көліктің айнасына ұрланған нөмірді қайтарып алу үшін өтемақы төлеу шарты жазылған жазуды қалдырып кеткен. Содан кейін ол нөмірлік белгі жасырылған мекенжайды хабарлады. Жедел-іздестіру іс-шаралары барысында күдікті ұсталды. Ол осыған ұқсас тағы 5 ұрлық жасағанын мойындады», – дейді Жетісу аудандық полиция басқармасының бастығы Жәнібек Шынасылов.
Аталған эпизодтар бойынша Қылмыстық кодекстің 188-бабына сәйкес сотқа дейінгі тергеу амалдары жүргізілуде.
