Шымкент әкімдігі «Шаңырақ» мемлекеттік бағдарламасы бойынша конкурс өткізілетіні туралы хабарлады.
Бағдарламаға қатысуға өтініштерді қабылдау мерзімі 23.05.2023 жылдан бастап сағат 10:00-ден 31.05.2023 жылдың 19:00-ге дейін жүргізілетін болады. Конкурстық пәтерлер «Тұран» шағынауданындағы 9 қабатты тұрғын үйлерде орналасқан 1, 2 және 3 бөлмелі пәтерлер.
«Шаңырақ» бағдарламасына тұрғын үй кезегінде тіркелген барлық санаттағы азаматтар қатыса алады. Бағдарлама бойынша 10% бастапқы жарнаны толтырып, жылына 5% мөлшермен 20 жылға дейін несие алуға мүмкіндік бар. Сонымен қатар аталған бағыт шеңберінде тұрғын үй сатып алу барысында банк мақұлдауын алғаннан кейін ипотекалық тұрғын үй қарыздарының бастапқы жарнасының бір бөлігін жабу үшін өтінім жолдай алады.
Конкурстық іріктеу мерзімі «Отбасы банкпен» төлем қабілеттілігін бағалау-брондау мерзімі аяқталғаннан бастап 5 жұмыс күні ішінде жүргізіледі. Айта кету керек, ал «Бақытты отбасы» бағыты бойынша келесі санаттар бойынша кезекте тұрған азаматтар да өтінім бере алады:
1) мүгедек балалары бар немесе оларды тәрбиелеуші отбасылар;
2) көп балалы отбасылар;
3) толық емес отбасылар.
Өтінішті беру банктің https://otbasybank.kz/ интернет ресурсында жүзеге асырылады.
Еске салайық, 2020 жылдан бастап Қазақстанда “Нұрлы жер” мемлекеттік бағдарламасының бағыттарының бірі — “шаңырақ”пилоттық жобасы іске асырылуда. Әкімдіктердің кезекте тұрғандарға арналған пәтерлер “5-10-20” схемасы бойынша ипотекаға сатылады. Тұрғын үй әкімдіктер де, жеке құрылыс салушылар да салған жаңа тұрғын үй кешендерінен сатып алынады.
“Шаңырақ” пилоттық жобасын іске асыру кезеңі 2020-2022 жылдарға есептелген. Алайда, тұрғын үй-коммуналдық инфрақұрылымды дамытудың 2026 жылға дейінгі тұжырымдамасында, 2022 жылғы 23 қыркүйекте “Нұрлы жер” бағдарламасының күші жойылды. Жаңа құжатта енді Қазақстанда жеңілдікті кредиттік тұрғын үйді сату “2-10-20” (“Бақытты отбасы” бағдарламасы) және “5-10-20” (“Шаңырақ”бағдарламасы) бағдарламалары аясында жалғастырылатыны айтылған.
Қарыз алушыларға қойылатын талаптар:
1) Қазақстан Республикасының азаматтығы;
2) тиісті қаржы жылына арналған республикалық бюджет туралы Заңмен бекітілген отбасының әрбір мүшесіне соңғы 6 (алты) айдағы Еңбек және (немесе) кәсіпкерлік қызметтен (зейнетақы аударымдарын, жеке табыс салығын және өзге де міндетті аударымдарды есепке алмағанда) ең төменгі күнкөріс деңгейінің 3,7 еселенген шамасына дейінгі табысының болуы. 2022 жылдың 1 сәуірінен бастап бұл отбасының әрбір мүшесіне 138 339 теңге. Бұл дегеніміз, егер отбасында 3 адам болса, онда ерлі-зайыптылардың жиынтық табысы 415 000 теңгеден аспауы керек, егер 4 адам болса, онда 553 357 теңге және т.б. Егер табыс жеткіліксіз болса, сіз екі қарыз алушыны тарта аласыз;
3) төлем қабілеттілігін растау;
4) жергілікті әкімдікте тұрғын үйге мұқтаж ретінде есепке қоюды растау.
Несиелеу шарттары
1. Қарыздың мақсаты-бастапқы нарықта тұрғын үй сатып алу, оның ішінде ЖАО-ның кредиттік тұрғын үйі. Тұрғын үйді үлестік қатысу шарты бойынша да сатып алуға болады (пайдалануға берілмеген), бірақ құрылыс салушыда тұрғын үй құрылысының бірыңғай операторының кепілдігі болған жағдайда ғана.
2. Сыйақы мөлшерлемесі-жылдық 5 % дейін.
3. Несиелеу мерзімі-20 жылға дейін.
4. Отбасы банкіндегі шотта бастапқы жарнаның болуы 10 дан кем емес%;
5. Астана, Алматы қалаларында және олардың қала маңындағы аймақтарында жеке құрылыс салушылардан тұрғын үй сатып алу кезінде қарыздың ең көп сомасы — 18 млн теңгеден аспайды; Атырау, Ақтау, Ақтөбе, Шымкент, Түркістан және Қарағанды облыстарында — 15 млн теңгеден аспайды; өзге өңірлерде — 12 млн теңгеден аспайды.
6. Әкімдіктер салған кредиттік тұрғын үй бойынша 1 ш. м. тұрғын үйдің мынадай баға параметрлері бекітілді:
* 240 мың теңгеге дейін — Алматы қаласында;
* 220 мың теңгеге дейін — Астана қаласында және оның қала маңындағы аймағында;
* 200 мың теңгеге дейін — Шымкент қаласында және Алматы қаласының қала маңындағы аймағында;
* 180 мың теңгеге дейін — Ақтөбе, Атырау, Ақтау, Түркістан қалаларында, Қарағанды және Қостанай облыстарында;
• қалған өңірлерде — 160 мың теңгеге дейін.
