Елімізде халық саны бойынша балалар мен қарттар үлесі 42 пайыздан асты. Мұндай статистиканы Finprom.kz порталы ұсынды.
Басылым мәліметінше, соңғы 5 жылдың ішінде Қазақстанда демографиялық жүктеме айтарлықтай артқан. Жұмысқа қабілеті бар әрбір 1 мың азаматқа шаққанда 740 қарт пен баладан келеді. Егер 2018 жылдан бергі демографиялық жүктеменің басты индикаторының эволюциясын қадағаласақ, көрсеткіштің жыл сайын тұрақты өсіп келе жатқаны байқалады. 5 жыл бұрын коэффициент 687 деңгейде, яғни осы жылға қарағанда 53-ке төмен болатын.
Бұл – халықтың үлкен жас топтары негізінде ұсынылған статистикалық деректер. Шын мәнінде, елдегі «экономикалық асыраудағы адам» әрбір мың адамға шаққанда 740-тан көп болуы ықтимал. Қолданыстағы әдістеме бойынша 16 жастан асқан балалар қазірдің өзінде еңбекке қабілетті тұрғын санатына кіреді. Дегенмен, бұл жаста өзін-өзі қамтамасыз ете алатын балалар саны тым аз. Сонымен қатар зейнет жасына жеткеніне қарамастан жұмысын жалғастыратын қарттардың бір бөлігін ескеретін болсақ, бұл дерек басқаша болар еді.
Көрсеткіштің өсуіне негізгі үлесті «балалар» демографиялық жүктемесінің коэффициенті қосып отыр. 2023 жылдың басында елдегі әрбір 1 мың ересек адамға 542 баладан келді. Ал 2018 жылдың қаңтарында олардың саны небәрі 496 болған еді. Соңғы бес жылда 15 жасқа дейінгі балалар саны 5,1 миллионнан 6,2 миллионға дейін өсті.
2023 жылдың басында халықтың жалпы санындағы балалардың үлесі 31,2 пайызды құрап, соңғы 5 жылдың ішінде 3 пайызға артты. Демографтар балаларды әлеуметтік қолдауға арналған бюджет шығындарының (қарттармен салыстырғанда) едәуір жоғары болуына қарамастан және асырау жүктемесінің негізгі бөлігін балалар құрап отырғанын болашақта экономика үшін қолайлы фактор деп атайды. Себебі алдағы 10-15 жыл ішінде балалардың көпшілігі еңбекке қабілетті жасқа толып, жұмыс күшінің қатарын арттыратын болады.
