Бұрынғы Төтенше жағдайлар министрі Юрий Ильинге қатысты тексеру жүргізілетін болды. Бұл туралы бүгін Үкімет отырысынан кейін тілшілер сауалына жауап берген Ішкі істер министрі Марат Ахметжанов айтты.
«Президент Бас прокурорға тапсырма берді. Соның аясында тексеру жұмыстары жүргізілетін болады. Өрт фактісі – бұл төтенше жағдай, қайтыс болғандар бар. Сол үшін қылмыстық іс аясында тексеру болады. Неліктен уақытылы шара қолданбады? Мүмкін немқұрайлылық, қызметтік міндеттерін орындамау бар шығар», – деді Марат Ахметжанов.
Бұдан өзге ІІМ өз сөзінде Семейдегі өртке қатысты іс қозғалып, тергеу жүріп жатқанын және өрттің шығу себебіне бірнеше нұсқалар қаралатынын алға тартты. Оның ішінде әдейі өртеу, найзағай түсу, немқұрайлылық нұсқасы да бар. Істі арнайы прокурорлар жүргізетін болады. Тергеуге 2 ай уақыт берілген.
