Шымкентте “Найза-антитеррор-2023” республикалық оқу-жаттығуы өтті, деп хабарлайды ELITAR.KZ ҚР ҰҚК-не сілтеме жасай отырып.
Шымкент қаласындағы “Ақтас” далалық оқу орталығында түрлі террористік көріністерге ден қоюға күш құрылымдарының жауынгерлік дайындығын арттыруға бағытталған “Найза-антитеррор-2023” Республикалық жедел-тактикалық оқу-жаттығуы өткізілді.
Оқу-жаттығуға Ұлттық қауіпсіздік комитетінің, Қорғаныс министрлігінің, Ішкі істер министрлігінің, Төтенше жағдайлар министрлігінің, Мемлекеттік күзет қызметінің, Ұлттық ұланның және ҰҚК Шекара қызметінің арнайы бөлімшелері қатысты. Терроризмге қарсы операцияларды жүргізу бойынша күш құрылымдарының арнайы бөлімшелері қызметінің күштері мен дағдылары кезең-кезеңімен көрсетілді. Арнайы операциялар мен Шекара қызметі күштерінің терроризм актілеріне ден қою жүйесіне ықпалдасуы қамтамасыз етілді.
Ұлттық ұланның “Бүркіт” арнайы бөлімшесі жауынгерлерге жақын жағдайларда елді мекенде террористік топты залалсыздандырудың күштік әдістерін пысықтады.
ҚМ арнайы операциялар күштерімен және ҰҚК ШҚ арнайы мақсаттағы басқармасымен шекара маңындағы террористерді бейтараптандыру, сондай-ақ мемлекеттік шекараны бұзуға жол бермеу жөніндегі іс-шаралар көрсетілді.
ҰҚК “А” арнайы мақсаттағы қызметі және ІІМ “Сұңқар” арнайы мақсаттағы жасағы әкімшілік ғимаратта кепілге алынғандарды босату бойынша оқу арнайы операциясын өткізді.
Республикалық және жергілікті арнайы мақсаттағы бөлімшелердің іс-қимылдарының жауынгерлік үйлесімділігі арттырылды. Шымкент қалалық терроризмге қарсы жедел штабы мүшелерінің Террористік көріністерге ден қою бойынша практикалық дағдылары бекітілді.
Сондай-ақ, күш ведомстволарының қару-жарақ пен техника көрмесі көрсетілді.
ҚР Терроризмге қарсы орталығының қолдауымен бұқаралық ақпарат құралдарының өкілдері үшін алғаш рет “ыстық” нүктелердегі оқиғаларды БАҚ-та жариялау дағдыларын пысықтаумен, сондай-ақ терроризмге қарсы операция аймағында қауіпсіздік шараларын сақтаумен семинар-тренинг өткізілді.
Оқу-жаттығу соңында терроризмге қарсы күрес жөніндегі республикалық жедел штабтың отырысы өткізілді, онда өткізілген іс-шараларға баға берілді. Күш құрылымдарының арнайы бөлімшелерінің іс-қимылдарының үйлесімділігін, сондай-ақ олардың террористік қатерлерді уақтылы тойтаруға дайын болу дәрежесін арттыру жөнінде қосымша шаралар әзірленді.
