Шымкент қаласы Тұран ауданының прокуратурасы тексеру жүргізіп, 6 843 837 тенге бюджет қаражатының талан-тараж болғанын анықтады. Осыған байланысты сотқа дейінгі тергеп-тексеру жұмыстарын бастады.
Бұл ақшалай қаражат 2022-2023 жылдар аралығында №73 орта мектепті ағымдағы жөндеу жұмыстарын жүргізуге, ғимаратты жылытып ұстау үшін көмір жеткізуге бюджеттен бөлінген. Бұл аздай, мектеп басшысы жұмыс атқармағанына қарамастан 2 қызметкерге ай сайын еңбекақы төлеп отырған. Яғни, өлі жандарды қаржымен қаматамасыз етіп келген.
Аудан прокуратурасы мектеп басшылығына қатысты Қазақстан Республикасы Қылмыстық кодексінің 189-бабы 3-бөлігінің 1-тармағы (Сеніп тапсырылған бөтен мүлікті иемдену немесе ысырап ету) бойынша сотқа дейінгі тергеп-тексеруді бастады. Басқа ақпарат ҚР ҚПК 201-бабының талаптарына сәйкес жария етуге жатпайды.
