Қыз зорлады деп айыпталған Жанқош Тұраровтың ісі қайта тергелмек. Жәбірленуші Әнару Құрманалиеваның адвокаты Ләззат Ахатова іс қайта қозғалғанын мәлімдеді.
Қорғаушының сөзіне сенсек, жәбірленуші тарап, қылмыстық істің қысқартылғаны туралы қаулыны жарты ай бойы алмаған. Сондай-ақ, олар іс, қайта жабылып қала ма деп алаңдаулы.
«Сонда да қайтадан депутат ағаларын қосып, қылмысын жабуға тағы күш сала ма деген күдік жоқ емес. Біздің елдің органдарын, заңының қалай жұмыс істейтінін білгесін, “жаман айтпай, жақсы жоқ” дегендей, ондай күдіктің болуы да заңдылық. Не жағдай болса да, барлығы ашылып, жасырмай, айтылды», – деді адвокат.
Естеріңізге сала кетейік, белгілі композитордың қызы, Әнару Құрмәнәлі өзін танымал боксшы Жанқош Тұраров зорлады деп айыптаған болатын. Кейіннен, спортшы ақталып, іс қысқартылған еді.
