Қарағанды облысының прокуратурасының бастамасымен үш жыл ішінде мемлекеттік сатып алу және бюджет саласында бірқатар заңбұзушылықтар тіркелген.
«Аталмыш салада 9 мыңнан астам заңбұзушылық анықталған. Негізсіз төлемдер 50 млрд теңгені, тиімсіз жоспарлау – 19 млрд теңгені құрайды. Прокуратураның мәліметіне сәйкес өнім жеткізушілерді жосықсыз деп тану туралы сотқа уақтылы жүгінбеген 178 лауазымды тұлға әкімшілік жауапкершілікке тартылды. Жыл басынан бері прокурорлардың наразылығы бойынша сомасы 5 миллиард теңгеден асатын 13 сатып алу тоқтатылды. Сметалар мен техникалық құжаттамадағы асыра бағалау 400 миллион теңгеден асты»,-деп жазылған мәлімдемеде.
Нәтижесінде, әкімдікке бюджет қаражатының жұмсалуына бақылауды күшейту қажеттілігі және жосықсыз жеткізушілерді бақылау үшін электронды платформа құру ұсынылды.
