Қазақстан Республикасының Бас прокуратурасы Ресей Федерациясынан Қазақстан азаматын экстрадициялады. Ол қылмыстық ұйымға қатысқаны, аса ірі көлемде есірткі заттарының заңсыз айналымы мен олардың контрабандасы үшін қылмыстық жауапкершілікке тартылып отыр.
Аталған азамат 2003 жылы Өзбекстаннан Қазақстан арқылы Ресейге героин мен опий жеткізумен айналысқан қылмыстық топтың құрамында болған. Ол есірткіні тасымалдау, сақтау және қылмыстық ұйым мүшелеріне жеткізу қызметтерін атқарған.
2003 жылы Қызылорда және Қарағанды облыстарында жүргізілген арнайы операциялар барысында қылмыскерлердің бір бөлігі ұсталып, олардың қолынан 35 кг героин мен 28 кг опий тәркіленген. Ұсталғандар кейін сотталып, ал күдікті құқық қорғау органдарынан жасырынуға үлгеріп, халықаралық іздеуге жарияланған.
20 жыл бойы жасырынып жүрген ол өткен жылдың желтоқсанында Ресейдің Самара облысында ұсталды. Қазақстан Бас прокуратурасының сұрауы бойынша ол елге экстрадицияланды.
Қазіргі уақытта күдікті тергеу изоляторына қамалып отыр.
Айыпталған қылмыстар үшін оның мүлкі тәркіленіп, 10 жылдан 15 жылға дейін бас бостандығынан айыру жазасы көзделген.
