Батыс Қазақстан облысының Сырым ауданына қарасты Жымпиты ауылында қайғылы жағдай тіркелді — жекеменшік тұрғын үйден шыққан өрт салдарынан бес бала көз жұмды.
Төтенше жағдайлар министрлігінің мәліметінше, қаза тапқан балалардың ең үлкені небәрі бес жаста болған.
«Өрт сөндірушілер қоңырау түскеннен кейін 5 минутта оқиға орнына жетті. Келген кезде жеке заттары мен жиһаздары 30 шаршы метр аумақта ашық жалынмен өртеніп жатқан. Құтқарушылар бес баланы ес-түссіз жатқан жерінен тапты. Өкінішке орай, балалар ауруханада көз жұмды», – деп хабарлады облыстық ТЖД.
Дәрігерлер бар күш-жігерін салғанымен, балаларды аман алып қалу мүмкін болмады.
Алдын ала мәлімет бойынша, өрт кезінде балалар көмірқышқыл газына тұншығып қалған. Оқиғаның нақты себебі анықталып жатыр.
