Түркістан қаласында түтінсіз темекі өнімдерін заңсыз өндіру және өткізу фактісі бойынша Омашев Р. мен Ташпулатов Е.-ге қатысты сот үкімі шығарылды. Қылмыстық істі Түркістан облысы бойынша Қаржылық мониторинг агенттігінің департаменті жүргізген.
Арнайы операция барысында жалпы аумағы 1000 шаршы метрді құрайтын, күнделікті 30-дан астам жұмысшы тартылған жасырын өндірістік цех анықталып, жойылды.
Тергеу барысында шикізатты дайындаудан бастап, логистиканы ұйымдастыру және Астана, Алматы, Шымкент қалаларындағы ірі көтерме жеткізушілер арқылы өнімді өткізетін қылмыстық схеманың толық тізбегі әшкереленді.
Заңсыз айналымнан 635 қорап дайын түтінсіз темекі өнімі, сондай-ақ адамдардың денсаулығына қауіпті 57 канистр хош иістендіргіш пен уытты қоспалар тәркіленді.
Сот санкциясымен өндірістік жабдықтар мен қылмыстық жолмен алынған табыстың есебінен сатып алынған автокөлікке тыйым салынды.
Сот айыпталушыларды кінәлі деп танып, айыппұл жазасын тағайындады. Сонымен қатар тәркіленген көлік пен өндірістік құрал-жабдықтар мемлекет меншігіне өтті.
Үкім әлі заңды күшіне енген жоқ.
