Алматыда алғаш рет отбасылық айтыс өтті

01 қазан, 12:05

Алматы қаласында «Nur Otan» партиясының қолдауымен «Отан отбасынан басталады» атты ақындар айтысы өтті. Бұл айтыстың басты ерекшелігі бір отбасынан шыққан ақындардың сахнада бір-біріне қарсылас атануы болды. Соған орай өнерсүйер қауым әже мен немере, әке мен бала, аға мен іні сияқты отбасылық айтыстарға куә болды. Бұл туралы партияның баспасөз қызметі хабарлады.

Айтыстың ашылу салтанатында «Nur Otan» партиясы төрағасының бірінші орынбасары Бауыржан Байбек бұл өнердің қазақ үшін қашанда орны бөлек екенін айтып, алдағы уақытта партия тарапынан айтысқа жүйелі қолдау көрсетілетініне тоқталды.

– Айтыс – ежелден келе жатқан асыл мұрамыз. Бұл өнердің әлем үшін де орны бөлек. Сондықтан ЮНЕСКО айтысты адамзаттың мәдени мұраларының тізіміне қосып отыр. Алдағы уақытта «Nur Otan» партиясы сөз сайысына жүйелі түрде қолдау көрсетеді. Бұл – тәуелсіздіктің алғашқы күнінен бастап айтысты қолдап келе жатқан Елбасы, партия төрағасының тікелей тапсырмасы... Бұл айтыстың тақырыбын «Отан отбасынан басталады» деп алуымыздың себебі ең басты құндылығымыз отбасы институтын одан әрі нығайтып, сол арқылы елдігімізді күшейту. Өйткені партиямыздың Доктринасында адам, оның бостандығы, заңның үстемдігі, әділеттілік сияқты құндылықтармен бірге отбасы және дәстүрге де ерекше мән берілген, – деді Бауыржан Байбек.

Сонымен қатар партия төрағасының бірінші орынбасары төл өнеріміздің халықты алаңдатқан мәселелердің оң шешілуіне ықпал ететін қозғаушы күш екенін де атап өтті.

– Айтыста қоғамдағы өзекті мәселелер ашық айтылып, ортаға түрлі оң ұсыныстардың тасталатыны белгілі. Мәселен таяуда ғана Қарағандыда өткен халықаралық ақындар айтысында көптеген ұтымды ойлар айтылды. Олардың бәрін жергілікті басшылық ескеріп, сол бойынша нақты жұмыстарды қолға алады деп сенеміз. Мәслихаттардағы біздің фракцияның мүшелері де осындай айтыстарға арнайы келіп, ақындар көтерген мәселелерді жазып алып, олардың әрі қарай орындалуын қадағалауға алады, – деді ол.

Отбасылық сөз сайысында еліміздің бірқатар өңірінен келген 7 ақындар жұбы өнер көрсетті. Атап айтқанда, айтыскер ана Егеухан Мұқамәдиқызы (Дәулеткерей Кәпұлының анасы) немересі, жас талант Ардакерей Кәппен, ақын Қайыртай Ақылбеков ұлы Рүстем Қайыртайұлымен, Бекарыс Шойбеков інісі (ағасының ұлы) Дәурен Ақсақаловпен, Иран-Ғайып Күзембаев ағасы Талғат Күзембаевпен, Амангелді Панабердиев ағасы Серікбол Панабердиевпен, Бекжан Ержігіт ағасы Ержан Әміровпен және Дидар Қамиев інілері Ұланғасыр, Айдар Қамиевтермен айтысты.

Қазылар алқасының шешімімен Қайыртай Ақылбеков мен Рүстем Қайыртайұлының жұбы бас жүлде 3 миллион теңгені еншіледі. Екінші орын (2 миллион теңге) әже мен немере болып сахнаға шыққан Кәп әулетіне бұйырса, үздік үштікті (1 миллион теңге) ағайынды Қамиевтер түйіндеді. Айтысқа қатысқан басқа да ақындарға қаржылай сый-сияпат көрсетілді.

Айта кетейік, бұған дейін елімізде «Nur Otan» партиясының қолдауымен жылдың соңына дейін бес бірдей аламан айтыс өтетіні жарияланған болатын. Алматыдағы айтыс соның үшіншісі. Бұған дейін Атырау және Қарағанды қалаларында ұйымдастырылды. Енді айтыс Нұр-Сұлтан және Орал қалаларында өтпек.

Сауалнама

Ақпараттың қандай түрі сіздің қызығушылығыңызды оятты?

Нәтиже