Абай облысына қарасты Үржар ауданында психиатр-наркологтың диспансерлік есебінде тұрған 62 адамның жүргізуші куәлігі бары анықталды. Бұл деректі аудан прокуратурасы жүргізген тексеріс нәтижесінде мәлім етті.
Аталған азаматтарда көлік басқаруға медициналық тұрғыдан қарсы көрсеткіштер бар. Мамандардың айтуынша, мұндай жағдайда жүргізуші денсаулығына байланысты көлікті басқаруды бақылаудан шығарып алуы мүмкін, бұл өз кезегінде жол-көлік оқиғаларына алып келу қаупін арттырады.
Мәселен, 2023 жылы аудан тұрғыны эпилепсия ұстамасы кезінде көлік жүргізіп, адам көп жүретін көшелердің біріндегі қиылыста есінен танып қалған. Салдарынан екі көлікке зақым келіп, бір жолаушы орташа дәрежедегі дене жарақатын алған.
Аудан прокурорының ұсынысымен полиция органдары сотқа 62 адамның жүргізуші куәліктерінің күшін жою туралы өтініш берді. Сонымен қатар, диспансерлік есепте тұрған тұлғалардың деректері полицияға жолданып, оларды жүргізуші куәліктерінен және қару ұстауға берілген рұқсаттарынан айыру шаралары қолға алынды.
