Түркістан облысы Келес ауданының тұрғындары алаяқтың құрбаны болды. Полиция департаментінің мәліметінше, алаяқ ер адам тұрғындардан қайтарымсыз несие алуға көмек беремін деп алдау жолымен ақша алып отырған.
Полицияға жәбірленушілердің бірі арызданған. Оның айтуынша, алаяқ ауыл тұрғынының сеніміне кіріп, 370 мың теңгеден астам ақшасын алған. Ұзақ уақыт уәдесін орындамай созып жүріпті. Полиция бөліміне алаяқтан зардап шеккен ауданның тағы бірнеше тұрғыны хабарласып дәл осындай ақпараттарды жеткізген.
Күдікті ұсталды. Ол Шымкент қаласының тұрғын болып шықты. Қазіргі таңда таңда тергеу ер адамның алаяқтықтың 16 жайтына қатысы бар екенін анықтады. Жәбірленушілерге келтірілген шығынның жалпы көлемі шамамен 5 миллион теңгені құрап отыр.
Ер кісінің әрекеті Қылмыстық кодекстің 190-бабы (Алаяқтық) бойынша тіркеліп, сотқа дейінгі тергеу амалдары жүргізілуде. Полицейлер оқиғаның толық мән-жайы анықтап жатыр.
