Алматы қаласы бойынша Қаржылық мониторинг агенттігінің департаменті «Matic Basket» атты қаржы пирамидасының қызметін әшкерелеп, тоқтатты.
Ұйымдастырушылар өз жобаларын «YouTube», «WhatsApp» және «Telegram» әлеуметтік желілері арқылы жарнамалап, азаматтарды инвестиция салуға шақырған. Олар криптовалюта нарығындағы майнинг пен трейдинг арқылы жоғары табысқа қол жеткізуге уәде берген.
Азаматтардың салған қаржысы 5 000 теңгеден 1 100 АҚШ долларына дейінгі көлемде болған. Дегенмен, салымшыларға бұл қаржы операцияларын растайтын ресми құжаттар берілмеген. Ешқандай келісімшарт жасалмаған.
Қатысушыларға жаңа салымшыларды тарту арқылы әрбір операциядан 10% көлемінде сыйақы берілетіні айтылған.
Нәтижесінде қаржы пирамидасына Қазақстан мен ТМД елдерінен 1900-ден астам адам тартылып, жалпы 80 миллион теңгеден астам қаражат салынған.
Қазіргі уақытта күдіктіге қатысты елден шығуға тыйым салынды. Тергеу амалдары жалғасуда.
