Осыдан алты жыл бұрын адам өлтірді деген күдікке ілінген Қазақстан азаматы Германиядан экстрадицияланды.
Германия Үкіметі өзара түсіністік қағидаты бойынша Қазақстан Республикасы Бас прокуратурасының адам өлтіруге күдікті азаматты ұстап беру туралы сұрау салуын қанағаттандырды. Қылмыс 2017 жылы Орал қаласындағы автотұрақ аумағында орын алған. Жанжал кезінде күдікті жәбірленушіге 7 рет пышақ жарақатын келтіріп, жәбірленуші соның салдарынан қайтыс болған.
Бұл қылмысты жасағаннан кейін күдікті қылмыстық қудалау органдарынан жасырынған, сол себепті оған қатысты халықаралық іздеу жарияланды.
«Бүгін Бас прокуратураның, Ішкі істер министрлігінің қызметкерлері Сыртқы істер министрлігінің көмегімен күдіктіні қылмыстық жауаптылыққа тарту үшін Қазақстанға экстрадициялады. Қазіргі уақытта ол Астана қаласының тергеу изоляторына қамалды» деп атап өтті Бас прокуратураның баспасөз қызметі.
Айта кетейік, қамауға алынған күдікті 8 жылдан 15 жылға дейін бас бостандығынан айырылуы мүмкін.