Қазақстанда 16,3 миллион азаматтың жеке мәліметтері интернетке тарағаны анықталды.
Деректердің ішінде азаматтардың тегі, аты-жөні, туған күні, ЖСН (жеке сәйкестендіру нөмірі), тұрғылықты мекенжайы, тіркелген орны, телефон нөмірлері, жынысы, азаматтығы мен ұлты туралы мәліметтер бар.
Мәліметтердің нақты қалай тарап кеткені әзірге белгісіз. Алайда кейбір болжамдарға сүйенсек, бұл деректер жабық Telegram арналары арқылы сатылған болуы мүмкін.
Цифрлық даму, инновациялар және аэроғарыш өнеркәсібі министрлігі жағдайды бақылауда ұстап отырғанын хабарлады. Ведомство өкілдері бұл мәселеге қатысты тергеу амалдары жүріп жатқанын, қосымша ақпарат тергеу аяқталғаннан кейін жарияланатынын мәлімдеді.
Азаматтарға жеке деректеріне сақтықпен қарау және белгісіз дереккөздерге сенбеу ұсынылады.
