Билікті асыра пайдаланды деп айыпталған бұрынғы Ішкі істер министрі Ерлан Тұрғымбаевқа қатысты сот шешімі шықты. Ол, ҚР ҚК 362-бабының 4-бөлігінде көзделген қылмысты жасағаны үшін кінәлі деп танылып, 10 жылға белгілі бір лауазымдарды атқару құқығынан айырыла отырып, 5 жылға бас бостандығынан айырылды.
Алайда, сыбайлас жемқорлық қылмыс белгілерінсіз айып тағылғандықтан, ҚК 63-бабы негізінде тағайындалған жазаны шартты деп санау туралы шешім қабылданды.
Айта кету керек, іс Астана қаласының қылмыстық істер жөніндегі ауданаралық сотында жабық түрде өтті.
Естеріңізге сала кетейік, 2022 жылғы қанды Қаңтар оқиғасынан кейін ішкі істер министрі қызметінен босатылған Ерлан Тұрғымбаев “билік пен лауазымдық өкілетін асыра пайдаланды” деген күдікпен ұсталған болатын.
