Жамбыл облысында 60 жастағы фермерден 8 келі есірткімен ұсталды. Полицейлер жедел-іздестіру шаралары барысында Меркі ауданындағы Тәтті ауылынан 17 шақырым жерде орналасқан шаруа қожалығының аумағындағы жертөледен ерекше иісі бар қоңыр-жасыл түсті, өсімдік тектес заты бар полиэтилен пакетін тапты.
Сараптама қорытындысына сәйкес табылған зат жалпы салмағы 7 келі 260 грамды құрайтын «кептірілген марихуана» және 88 грамм «гашиш» есірткі болып шықты.
Ұсталған күдікті Шу ауданының тұрғыны. Ол өз өз кінәсін мойындап, Меркі ауданының уақытша ұстау изоляторына қамауға алынды.
«Қазіргі уақытта осы дерек бойынша Қылмыстық кодекстің 296-бабы 4-бөлігі (аса ірі мөлшерде есірткі құралдарын заңсыз сақтау) бойынша сотқа дейінгі тергеп-тексеру басталды. Осы баптың санкциясы 3 жылдан 7 жылға дейінгі мерзімге бас бостандығынан айыру түріндегі жазаны көздейді»,-деді Жамбыл облыстық ПД Есірткі қылмысына қарсы іс-қимыл басқармасының бастығы Әлім Бажықбаев.