Демалыс күндері Қарағанды облысында желді дауыл соғып, елді дүрліктірді. Яғни бірнеше ғимараттың шатыры ұшып, кейбірінің қабырғасына зақым келген. Қазіргі таңда, төтеншеліктер тынымсыз жұмыс жасауда. Осыған байланысты, әкімдік тарапы төтенше жағдай режимін енгізді.
«18-19 қарашада аймақта қатты желдің салдарынан 114 тұрғын үй мен әртүрлі ғимараттардың шатырына, қабырғасына зақым келді. Қираған шатырдың жалпы ауданы — 18 947 шаршы метр. Қарағанды, Теміртау, Балқаш, Шахтинск, Ақтоғай, Абай, Бұқар жырау, Осакаров, Нұра, Қарқаралы және Шет аудандарының аумағында электр энергиясы ішінара өшіп қалды. Қазіргі уақытта облыстың елді мекендерінің басым бөлігі электр энергиясына қосылған, үш қалада және төрт ауданда авариялық жұмыстар жалғасып жатыр. Сондай-ақ, ағаштардың қирауы мен құлау қаупі туралы 85 хабар түсті», — деді ТЖ департаментінің бастығы Мұрат Қатпанов.
