Алматы полициясы Аустралия азаматының жоғалып кету дерегі бойынша іздестіру ісін қозғады. Қазіргі таңда криминалдық полиция қызметкерлері, учаскелік инспекторлар мен кинолог-мамандар арасынан арнайы жедел-тергеу тобы құрылды.
«Шетелдік азаматты іздеу бойынша барлық полиция бөлімшелеріне бағыт-бағдар берілді. Сонымен қатар еріктілердің ресурстары барынша пайдаланылуда. Қазір қолда бар ақпаратқа сәйкес, Аустралия азаматын 21 мамырда Үлкен Алматы көлі аймағында көрген. Ер адам космостанцияға қарай бет алған. Аталған аумақты ескере отырып, тікұшақ бригадалары мен республикалық жедел-құтқару жасағының күштері тартылды. Бейнебарлау дрондармен жүргізіліп жатыр», – деді Алмалы аудандық ПБ бастығы Есен Ысқақов.
Еске салсақ, бұған дейін еріктілер 1995 жылы дүниеге келген шетелдік туристің Үлкен Алматы көліне кетіп, қайтып оралмағаны туралы дабыл қаққан болатын.
