Израиль армиясы Ливандағы бітімгершілік базасына басып кіріп, негізгі танк қақпасын қиратты. Салдарынан, 15 сарбаз жарақат алды. Осыған байланысты, ҚР Қорғаныс министрлігі қазақстандық бітімгерлердің жағдайы бойынша мәлімдеме берді. Яғни, қазақстандық бітімгерлер, оның ішінде үш штабтағы офицерлер штаттық режимде жұмыс істеп жатыр.
«Жағдай шиеленіскен уақытта қазақстандық әскери қызметшілерді эвакуациялау мәселесі БҰҰ хатшылығымен және миссия басшылығымен бірлесіп қабылданатын болады. Қорғаныс министрлігі олармен үнемі байланыста», – деп атап өтті ведомствоның ресми өкілі Руслан Жангулин.
Израиль премьер-министрі Биньямин Нетаньяху бұған дейін БҰҰ бас хатшысы Антониу Гутерриштен бітімгершілік күштерді дереу шығаруды сұраған болатын.
Айта кетейік, Израиль Ливанның оңтүстігінде Хезболлаға қарсы соғыс науқанын күшейтіп жатыр. БҰҰ-ның 10 000 адамнан тұратын бітімгершілік күштері шабуылға ұшырап жатыр. Кейінгі күндердегі ұрыс кезінде БҰҰ-ның кем дегенде бес бітімгері жараланды.
