13 маусымға қараған түні Израильдің әскери әуе күштері Иран астанасы Тегеранға соққы жасады. Израиль билігінің мәлімдеуінше, бұл операция Иранның ядролық бағдарламасын жоюды көздейді.
Әуе шабуылдары уран байыту зауыттары орналасқан Тегеран, Тебриз, Керманшах, Исфахан және Нетенз қалаларындағы нысандарға бағытталғаны хабарланды.
«Көп жылдар бойы Иран тікелей және жанама түрде Израильге қарсы терроризмді қолдап келді. Ол Таяу Шығыстағы сенімді өкілдері арқылы терактілерді қаржыландырып, ұйымдастырды, сонымен қатар ядролық қару жасауға ұмтылды. Соғыстың басталуынан бері Израильге қарсы жасалған барлық терактілерге Иран режимі басты кінәлі», – деп атап көрсетілген Израиль армиясының баспасөз қызметінің мәлімдемесінде.
Әуе шабуылдарынан кейін Израиль премьер-министрі Биньямин Нетаньяху арнайы операцияның басталғанын жариялап, бұл операция «ирандық қауіп-қатер толық жойылғанға дейін» жалғасатынын мәлімдеді.
