Оқиға таңғы сағат 06:00 шамасында Теміртау қаласындағы Тищенко көшесінде болған. Полиция бөліміне автокөлік ұрлығы болғандығы туралы хабарлама келіп түскен.
Рolisia.kz жазуынша, 28 жастағы жәбірленуші кешкілік уақытта өзінің автокөлігін күзетілмейтін тұраққа қойған, алайда таңертең оны белгісіз біреу айдап кеткен. Келтірілген шығын көлемі 6,5 млн теңгені құрады.
Жүргізілген кешенді іс-шаралар барысында ұрланған көлік ықшам аудандардың бірінен табылды. Көлікті айдап әкеткен 18 жастағы бойжеткен рөлге ие бола алмай, жол-көлік оқиғасына түскен. Ол әртүрлі дене жарақаттарымен ауруханаға жеткізілді.
Жас қыз бөтеннің көлігін қалада айдап келу үшін мініп кеткенін айтып, кінәсін мойндаған. Оның үстінен Қылмыстық кодекстің 200-бабы (Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу) бойынша қылмыстық іс қозғалды. Тергеу амалдары жүргізілуде.
