Ағзасын ауыстыру мақсатында Түркияға барған Қазақстан азаматшасы ұсталды. Сыртқы істер министрлігінің мәліметінше, отандасымызға жалған құжат жасады деген айып тағылып отыр. Бұл туралы ведомствода өткен брифинг кезінде Сыртқы істер министрлігінің ресми өкілі Айбек Смадияров мәлімдеді.
«Біздің дипломаттардан түскен ақпарат бойынша түрік құқық қорғау органдары Қазақстан азаматшасын ұстаған. Ол Түркияға ағза трансплантациялау үшін барған. Алдын ала мәлімет бойынша, отандасымыз жалған құжат жасады деп айыпталып отыр. Ол донорды туысы ретінде көрсеткен. Бірақ донордың мүлдем басқа елдің азаматы болуы құзырлы органдардың күмәнін тудырған. Сондықтан қазақстандық әйел қазір қамауда отыр. Оқиғаның мән-жайын тергеу анықтайды», – деді министрлік өкілі.
Қазақстанның Түркиядағы консулдығы отандасымызға қатысты істі бақылауда ұстап отыр.
