Абай облысында алапат орман өртін сөндіруге барған жергілікті бір тұрғын хабарсыз кетті. 1987 жылы дүниеге келген ер адамның жоғалғанын облыстық Полиция департаментіндегілер растады.
Полицияға ер адамның туыстары хабарлаған. 1987 жылы дүниеге келген Бесқарағай ауданының тұрғыны Сергей Архипов 10 маусым күні жеке тракторымен өрт сөндірушілерге көмекке шыққан. Ол туыстарымен соңғы рет сол күні кешке байланысып, содан бері хабарсыз кеткен.
Полиция қызметкерлері мен ТЖМ мамандары іздестіру жұмыстарын жүргізіп жатыр.
«Егер сізде Сергей Архиповтың орналасқан жеріне қатысты қандай да бір ақпарат болса, «102» нөміріне немесе жақын маңдағы полиция бөлімшесіне хабарласуыңызды өтінеміз», – делінген Абай облыстық Полиция департаментінің баспасөз қызметі таратқан мәліметте.
