Ұлытау облысы, Сәтбаев қаласында 32 жастағы ер кісі аурухана тұрағында тұрған жедел жәрдем көлігін айдап кеткен. Оқиға таңғы сағат 5.30-дар шамасында орын алған. Бұл туралы Polisia.kz жазды.
Жедел жәрдем қызметіндегілер шақырту бойынша науқасты медицина мекемесіне алып келген. Оны ішке кіргізуге жүргізуші көмектескен екен. Осы сәтті пайдаланған ішіп алған ер кісі көлікке отырып, айдап кетіпті. Алайда ол жедел жәрдем көлігін басқара алмай, жолда аударылып қалған.
Күдікті көп ұзамай ұсталды. Оның көлікті ұрлаған кезде мас күйінде болғаны медициналық сараптама қорытындысымен расталыпты. Оған қатысты ҚР ҚК-нің 608-бабы (Жүргізушінің көлік құралын алкогольдік масаң күйде басқаруы) бойынша әкімшілік материал толтырылды. Сонымен қатар ҚР ҚК-нің 200-бабы бойынша (Көлік құралын автокөлікті немесе өзге де көлік құралын ұрлау мақсатынсыз заңсыз иелену) сотқа дейінгі тергеу басталды.
