Мұхтар Әбілязовтың халықаралық іздеуде жүрген тағы бір сыбайласы Қазақстанға әкелінді. Бұл туралы Сыбайлас жемқорлыққа қарсы іс-қимыл агенттігі хабарлады.
«БТА-Банк» АҚ бұрынғы топ-менеджментіне қатысты қылмыстық іс бойынша 2011 жылдан бастап «Жаңа Қалқаман» ЖШС атаулы директоры Пак Виталий Леонидович іздеуде болған. 2006-2008 жылдар кезеңінде осы компанияны заңсыз несиелеу арқылы Мұхтар Әбілязов пен оның сыбайластары 8,9 млрд теңгеден астам сомаға ақшалай қаражатты ұрлаған. 2019 жылы Виталий Пак ҚХР (Чэнду қ.) аумағында анықталды» делінген ведомство мәліметінде.
Күдіктінің жақын туыстарымен және адвокатымен тиісті түсіндіру жұмыстары жүргізілгеннен кейін ол Қазақстанға оралуға ниет білдіріп, ол туралы жазбаша өтініш жолдады.
ҚР ІІМ Интерполдың көмегімен Виталий Пак Чэнду қаласынан Алматыға келіп, тергеу изоляторына қамалды. Сотқа дейінгі тергеу жалғасуда.
