Түркістан облысы Түлкібас ауданындағы ойынханалардың біріндегі кассадан 1 миллион теңге ұрланды. Полицияға ондағы қызметкер хабарласқан. Оның айтуынша, таңғы уақытта жұмысшы қыздар ұйықтап жатқанда белгісіз біреу кассадағы қомақты ақшаны жымқырып кеткен. Аталған жайт Қылмыстық кодекстің 188-бабы «Ұрлық» бойынша тіркелді.
Облыстық Полиция департаментінің мәліметінше, жедел-іздестіру шаралары кезінде бейнебақылау камераларының көмегімен күдіктінің жеке басы анықталған. Ол тұрғылықты жерінен санаулы сағаттарда ұсталған.
«Күдікті – осы ойынхананың тұрақты келушісі. Ұрлық болған күні ол ойынханада болған. Сағат 06:30 шамасында кассада отыратын қыздардың ұйықтағанын пайдаланып, ірі көлемдегі қаражатты жымқырып кеткен. Оңай жолмен келген ақшаны өз қажеттілігіне жұмсап үлгерген. Тергеу амалдары жүргізілуде. Сонымен қатар ойынхана қызметінің заңдылығын тексеру бағытында кешенді іс-шаралар атқарылуда» деп атап өтті ведомстводан.
