Түркістанда «Қазақстан аруы» ұлттық сұлулық байқауының аясында «Түркістан аруы-2023» байқауның жеңімпазы анықталды.
Түркістан облысы әкімдігінің қолдауымен өткен сұлулық сайысына қатысу үшін облыстың түкпір-түкпірінен 100-ге жуық ару өтініш білдірген. Үш рет кастинг өткізіліп, ақтық сынға 9 қыз жолдама алған.
Финалда арулар өзін таныстыру, шығармашылық бағытта өнері және қазақша көйлектермен дефиле көрсету бойынша сайысты. Қазылар алқасының қорытындысымен Ербосын Диана «Түркістан аруы – 2023» атанды. 20 жастағы бойжеткен Халықаралық қазақ-түрік университетінің 3 курс студенті және 3 жылдан бері маркетолог маманы болып жұмыс істейді. Шымкентте дүниеге келген ару қаладағы Мұхаммед Хайдар Дулати атындағы 3 тілде оқытатын №8 мектеп-гимназиясының түлегі.
Облыс әкімдігі таратқан ақпарат сүйенсек, сондай-ақ үш ару «Түркістан вице-аруы» номинациясын иемденді. Атап айтқанда, Түркістан жоғары медицина колледжінің түлегі Құрбанғалиева Нурила бірінші «Түркістан вице-аруы» номинациясын алса, екінші вице-мисс номинациясы Халықаралық туризм және меймандостық университетінің 4 курс студенті Анварова Гүлжайнаға бұйырды. Үшінші вице-мисс номинациясын Боранбай Сымбат алды.
Instagram әлеуметтік желісінде дауыс беру арқылы анықталған «Түркістан интернет аруы» номинациясын Түркістан облысы «Жастар ресурстық орталығы» мекемесінің қызметкері Жұмахан Нұрғайша иемденді.
Сұлулық сайысының жеңімпазы Алматы қаласында өтетін «Қазақстан аруы» байқауына өңірдің намысын қорғауға аттанады.
(Фотолар: Түркістан облысы әкімдігі баспасөз қызметі)
