Түркістан облысы Сауран ауданындағы тұрғындар алаяқтың құрбаны болды. Күдікті ер кісі оларды мемлекеттен қайтарымсыз несие алып беремін деп 30 миллион қарызға батырған.
Аудандық полиция бөліміне алаяқтың құрбаны болған 40-тан астам ауыл тұрғыны шағым түсірді. Олардың айтуынша, таныс ер адам мемлекеттен қайтарымсыз несие алуға көмектесетінін айтып, алдын ала әрқайсысынан 300 мыңнан 2 миллионға жуық ақшаларын алған. Одан кейін алаяқ бір жыл бойы берген уәдесін орындамай не ақшасын қайтармай әбігерге салған.
Аталған факті ҚР ҚК-нің 190-бабы «Алаяқтық» бойынша тіркелді. Жедел-іздестіру іс-шараларының нәтижесінде күдіктінің жеке басын анықталып, полицияға жеткізді. Ол бұрын сотты болған жұмыссыз, түркістандық тұрғын болып шықты. Тергеу барысында ұсталған ер адам алдау жолымен алған 30 миллионға жуық қаражатты өзінің қажеттілігіне жаратып жібергенін мойындады.
Полиция департаментінің хабарлауынша, күдікті қамауға алынды. Сотқа дейінгі тергеп-тексеру амалдары жүргізілуде.
