Шымкентте 10 жасар бала күндізгі уақытта аулада серуендеу үшін үйінен шығып қайта оралмаған. Бірнеше сағаттан кейін анасы дабыл қағып, ұлын достары мен көршілерінен сұрастыра бастаған.
Өз бетінше жүргізген іздеу жұмыстары нәтиже бермеген соң баланың анасы түнде полициядан көмек сұраған.
Полиция мәліметінше, жоғалған оқушының жүрген жерін анықтауға Тұран аудандық ПБ-ның барлық жеке құрамы жұмылдырылыпты.
«Тәртіп сақшылары мекен-жайға жақын орналасқан жасөспірімдердің жиі болатын жерлерін, саябақтарды, ойын алаңдарын, сауда нүктелерін тексеріп, сыртқы бейнекамералардың жазбаларын қарады. Іздеу жұмыстары жарты күнге созылды. Нәтижесінде, баланың тұрғылықты жерінен 10 км қашықтықта қаланың шетіндегі әжесінің үйіне жаяу жеткені анықталды. Жасөспірім анасына аман-есен қайтарылды. Ол өз әрекетін әжесін қатты сағынуымен түсіндірді» деп хабарлады полициядан.
