Түркі мемлекеттеріне ортақ бірынғай әліпби жасау туралы ұсыныс Бурсада өткен семинарда талқыланды, деп хабарлайды Түркияның Anadolu агенттігі.
Түркияның Бурса қаласында Тіл күнінің 90-жылдығы аясында өткен «Түркі әлемінің ортақ әліпбиі жөніндегі семинарда» Бірыңғай әліпби жасау жөнінде ұсыныс тастаған.
Семинарды Түрік тілі қоғамының (TDK) басшысы Гюрер Гүлсевин жүргізді. Оған ҰТК Ақсақалдар кеңесінің басшысы, Түркияның Әділет және даму партиясы төрағасының орынбасары Бинали Йылдырым қатысты.
Іс-шарада түркі мемлекеттерінің ғалымдары өз елінің тілі, әліпбиі және тарихи тілдік үдерістері жөнінде мағлұмат беріп, біртұтас әліпбиге көшудің маңызын айтқан.
Семинар аясында ҰТК жанынан «Бірыңғай әліпби жасау комиссиясын» құру туралы шешім қабылданды.
Комиссия құрамына түркі мемлекеттеріндегі тіл саясаты мәселелерімен айналысатын әр ресми құрылымнан екі мүшеден кіреді.
Комиссия біртұтас әліпби туралы есеп беруді ҰТК Ақсақалдар кеңесіне ұсынуы керек.
Бірыңғай әліпби жасау жөніндегі комиссияның бірінші отырысы Қырғызстанда өтеді.
