Батыс Қазақстан облысы Ақжайық ауданының прокуратурасы балалар тасымалын ұйымдастыру қызметін талдау нәтижесінде аудан әкімдігі шалғайдағы елді мекендерде тұратын балаларды мектепке тасымалдау тәртібін айқындамағанын анықтады.
Қазақстан Республикасының «Автомобиль көлігі туралы» Заңына сәйкес аудандардың әкімдіктері шалғайдағы елдi мекендерде тұратын балаларды жалпы бiлiм беретiн мектептерге тасымалдаудың схемасы мен тәртiбiн әзірлейді және бекiтедi деп хабарлады ҚР Бас Прокуратурасы.
Талдау барысында Есенсай – Жазира – Тасоба, Ақсуат – Ақбұлақ, Ақсуат – Сахарный, Талап – Әтібек, Базаршолан – Баянтөбе және т.б. бағыттарда барлығы 90-ға жуық оқушы тасымалы реттелмегені белгілі болды.
Прокуратураның аудан әкіміне енгізген ұсынуы негізінде тиісті қаулы қабылданды.
Осылайша, мектебі жоқ елді мекендерден 88 баланың қауіпсіз тасымалына қатысты мәселе шешілді.
