Алматы қалалық прокуратурасының үйлестіруімен қалалық Полиция департаменті аса ірі көлемдегі алаяқтық фактісі бойынша жүргізілген тергеуді аяқтап, қылмыстық істі сотқа жолдады. Іс бойынша негізгі айыпталушы және оның 12 туысы жауапқа тартылып отыр.
Тергеу мәліметтеріне сәйкес, айыпталушы мессенджерлердегі чаттар арқылы Қытай, Өзбекстан және Ресей зауыттарымен тікелей жұмыс істейтінін айтып, ыдыс-аяқ, жиһаз және тұрмыстық тауарларды төмен бағамен ұсынған. Алайда ол бұл әрекеттерін қылмыстық схеманы жасыру үшін Алматыдағы базарлардан өз қаражатына тауар сатып алу арқылы бүркемелеген.
Жәбірленушілерге тауар жеткізу 6 айдан 12 айға дейін кешіктіріліп жүзеге асырылған. Осы уақыт ішінде қатысушылар көтерме тапсырыстар арқылы шығындарды жапқан.
Алаяқтықтан түскен қаражат қымбат автокөліктерге, жылжымайтын мүлікке, киім-кешек пен шетелдік саяхаттарға жұмсалған. Сонымен қатар, букмекерлік кеңселерде де қаржы қойылған.
Тергеу нәтижесінде: 34 автокөлік, 2 пәтер, 1 пентхаус, жер учаскесі бар 2 тұрғын үйге тыйым салынды.
Алданған азаматтардың саны – 290 адам. Залал көлемі – 4,6 миллиард теңге. Қылмыстың географиясы Алматыдан бастап Саран қаласына дейінгі аумақты қамтиды.
Қылмыстық іс ҚР Қылмыстық кодексінің 190-бабы 4-бөлігінің 2) тармағы бойынша (аса ірі мөлшердегі алаяқтық) тіркелген. Бұл бап бойынша 10 жылға дейін бас бостандығынан айыру жазасы көзделген.
