Елімізде Төтенше жағдайлар министрлігі 25 миллиард теңгеге 11 ұшақ сатып алмақшы.
Үкіметтің мәліметіне сәйкес, 2027 жылға дейін республикалық бюджеттен кезең-кезеңімен 24,8 миллиард теңге бөлінеді. Бұл мәселе республикалық бюджет комиссиясының отырысында тұжырымдамалық қолдауға ие болған. Тиісті қаулыға ҚР Премьер-Министрі Олжас Бектенов қол қойды.
Сатып алынатын ұшақ, төтенше жағдайлар аймақтарынан адамдарды эвакуациялау және құтқару бөлімшелерінің жедел әрекет етуін қамтамасыз ету үшін пайдаланылмақ.
«Қаржы лизингі тетігін пайдалану арқылы ТЖМ материалды-техникалық базасын жабдықтау үшін 11 әуе кемесін сатып алу жоспарланып отыр. 24,8 млрд теңге мөлшеріндегі қажетті сома республикалық бюджеттен 2027 жылға дейін кезең-кезеңімен бөлінетін болады», – делінген хабарламада.
Айта кетейік, биыл шілде айында ТЖМ құрамындағы департамент базасында Төтенше жағдайлардың алдын алу комитеті құрылған болатын. Оған Үкімет 1,6 млрд теңге бөлді. Жобаның түсіндірме жазбасында 2024-2028 жылдар аралығында бүкіл жобаны жүзеге асыруға жалпы сомасы 1 638 715 000 теңге бөлінетіні жазылған.
