Сыртқы істер министрлігінің ресми мәліметіне сәйкес, БАӘ-дегі елшінің кеңесшісі қызметтен кеткен. Яғни, Айбек Смадияровтың сөзінше, Сәкен Мамаш 6 мамырда Қазақстанға ұшып келіп, 9 мамыр күні шекарадан өткеннен кейін қолданыстағы заңнамаға сәйкес қызметінен босатылды. Құқық қорғау органдары оның үстінен іс қозғады.
“Бұл істің егжей-тегжейлері бізге беймәлім, біздің оған араласуға құқығымыз жоқ. Мен Каринамен жеке кездесіп, сөйлестім. Біз оған барынша қолдау көрсетеміз”, – деді СІМ өкілі.
Естеріңізге сала кетейік, осыдан бір апта бұрын шенеуніктің әйелі күйеуінен зәбір көргенін айтып, көмек сұраған. Ол, видеоүндеу жасап, талай жылдан бері таяқтық астында жүргенін жеткізген. Бұл туралы, #Немолчикz хабарлаған болатын.
“Күйеуімнің маған жасаған барлық қиянаты үшін дипломатиялық мәртебесінен айырылып, түрмеге жабылғанын қалаймын. Физикалық, жыныстық, эмоционалдық, экономикалық, тұрмыстық зорлық-зомбылық жасағаны үшін жауап беруі тиіс”, – деді Карина Мамаш.
