Түркістан облысы Төлеби ауданында бизнес ашпақ болған тұрғын танысының құрбаны болды. Оның айтуынша, таныс ер кісі бірлесіп автокөлік жуу орталығын ашамыз деп ұсыныс тастаған. Кейін оған 800 мың теңге несие алдырған. Оқиға сәуір айында болған. Содан бері құрғақ уәдеге сеніп келген жәбірленуші танысының үстінен полицияға арызданған.
«Аталған жайт Қылмыстық кодекстің 190-бабы «Алаяқтық» бойынша тіркелді. Полицейлер жедел-іздестіру іс-шараларының нәтижесінде күдіктінің жеке-басын анықтады. Ол жергілікті тұрғын ер адам болып шықты. Сотқа дейінгі тергеу амалдары жүргізіліп жатыр. Тәртіп сақшылары күдіктінің бұдан басқа да қылмыстарға қатысы бар-жоқтығын тексеруде»,-деді облыстық Полиция департаментіндегілер.
Ұсталған азамат жауап алу кезінде алдау жолымен алған ақшаны өзінің қажеттілігіне жаратып жібергенін айтқан.
