Әлеуметтік желіде жігітті алып қашу операциясының видеосы пайда болды. Онда аялдамада тұрған ер азаматтың қасына жас қыз жақындап, танысуын сұрайды.
«Жігіт, танысайықшы. Ұнап қалдың. Телефон нөмеріңді берші»,-дейді бойжеткен. Алайда жас жігіт ұялған кейіп танытып, танысудан бас тартады. Осы сәтте жігіттің артынан бетіне бетперде киген жас қыз келіп, үш бойжеткен жігітті көлікке сүйреп отырғызады. Олар мінген көлік жүріп кетеді.
Қыздардың ерсі қылығы ондағы тұрғындарды таң қалдырғанымен, жігітке ешкім араша түспеген. Белгілі болғандай, бұл бейнежазбаны белсенді жастар эксперимент ретінде түсірген көрінеді. Осылайша олар халықтың көзқарасын байқамақ болған сияқты.
Видеоны көрген желі қолданушылары қыздардың бұл әрекетін күлкіге балап, тіпті кейбірі жігіттер қауымы да алып қашудың не екенін түсінгені дұрыс деген пікірлерін қалдырды.
