Шығыс Қазақстан облысының полицейлері мемлекетаралық іздеуде жүрген мал ұрысын ұстады. 63 жастағы зейнеткер 36 бас жылқы ұрлады деген күдікке ілінген. Оқиға қыркүйек айының басында болған.
Облыстық Полиция департаментінің мәліметінше, Тарбағатай ауданының тұрғыны иелігіндегі жылқылардың ұрланғаны туралы арызданған. Жедел-тергеу тобы құрылып, 22 қыркүйекте Зайсан ауданының аумағында ұрланған малдың жүрген жері анықталып, ол жәбірленушіге қайтарылған. Қолда бар ақпарат бойынша ұрлық және басқа да осыған ұқсас қылмыстарға Зайсан ауданының 63 жастағы тұрғыны қатысы бар екені анықталған. Ол белгісіз бағытта жасырынғандықтан ағымдағы жылдың 5 қазанынан бастап оған мемлекетаралық іздестіру жарияланған.
ШҚО және Астана қалалық Полиция департаментінің қызметкерлері жүргізген іздестіру жұмыстарының нәтижесінде күдікті елордада ұсталды. Ол Астана қаласының тергеу изоляторына қамауға алынды.
«Қолда бар ақпарат бойынша оның Тарбағатай ауданының аумағында 2018-2022 жылдар аралығында орын алған мал ұрлығының 6 фактісін жасауға қатысы бар. Қазіргі уақытта жәбірленушілерге бұрын ұрланған 70 бас мал қайтарылды. Аталған факті бойынша ҚР ҚК-нің 188-1-бабы бойынша сотқа дейінгі тергеу жүргізілуде» деп атап өтті ведомстводан.
