Түркістанда тұрғындарды алдап кеткен жас қыз ұсталды. Жәбірленушілердің бірі полицияға арызданған. Ер адамның айтуынша, оның әйелін жақын таныс емес жас қыз алдап кеткен. Алаяқ аукционнан қомақты ақша шығарып беремін деп сендірген. Осы қызметі үшін жәбірленушіден 800 мың теңге алған. Алайда арадан 1 жыл уақыт өтсе де, сенген адамы не уәдесін орындамаған, не алған ақшасын қайтармаған.
«Аталған жайт ҚР ҚК-нің 190-бабы «Алаяқтық» бойынша тіркелді. Жедел-тергеу тобы жұмысының нәтижесінде күдікті бойжеткен тұрғылықты мекенжайынан анықталды. Ол жұмыссыз, Шымкент қаласының тұрғыны болып шықты. Қазіргі таңда жас қыз қамауға алынып, тергеу амалдары жүргізілуде» деп атап өтті Түркістан облыстық Полиция департаментіндегілер.
Күдіктінің жалпы 15 алаяқтық фактісіне қатысы бары анықталды. Жәбірленушілерге келтірілген шығын көлемі — 4 миллион теңгеге жуық. Бойжеткен қыз қаражатты өзінің қажеттілігі үшін жұмсап жіберген.
