Түркістан облысында суға батып кеткен екі шетелдік студенттің бірінің денесі табылды. Бұл туралы облыстық Төтенше жағдайлар департаменті хабарлады.
«10 қазан күні сағат 13:15- Ақсу өзенінен Ханарық ауылының солтүстік жағынан төмен қарай 1,5 шақырым жерде республикалық жедел-құтқару жасағының құтқарушылары бір адамның мәйітін тапты. Табылған мүрде сараптама жүргізу үшін полиция қызметкерлеріне тапсырылды» деп атап өтті ведомстводағылар.
Қалған бір адамды іздестіру жұмыстары жалғасуда. Іздеу жұмыстарына республикалық жедел-құтқару жасағынан 5 құтқарушы, 1 жүзу құралы, Түркістан облысы ТЖД 7 құтқарушы, 1 жүзу құралы жұмылдырылды.
Еске салсақ, ағымдағы жылдың 26 маусым күні сағат 20.10-да кезекші-диспетчерлік қызметтің пультіне сағат 16.49-да Төлеби ауданының Ханарық ауылынан 5 шақырым жерде орналасқан Ақсу шатқалындағы Ақсу өзенінде 2001 жылы дүниеге келген екі студенттің белгісіз жағдайда суға түсіп, батып кеткені туралы ақпарат түскен болатын.
21 студенттен құралған топ Шымкент қаласынан келген. Барлығы Үндістан елінің азаматтары. Олар Оңтүстік Қазақстан медицина академиясының студенттері.
