Түркістан облысы Жетісай ауданында 13 жасар оқушы үйінен кетіп қалды. Бұл туралы Жылысу ауылының тұрғыны 102 қызметі арқылы полицияға хабарлап, көмек сұраған. Оқушының анасының айтуынша, баласы түскі уақытта үйінен шығып, қайта оралмаған. Ұлын 2 күн бойы іздеген. Нәтиже шықпаған соң полицейлердің көмегіне жүгінген.
«Жоғалған баланы табу мақсатында қажетті деп танылған барлық жедел-іздестіру жұмыстарын ұйымдастырды. Аудан көшелерін тексеріп, көрген-білген тұрғындардан сұрастыру жұмыстары жүргізілді. Нәтижесінде полицейлер тәулік ішінде баланы Алматы қаласындағы туысқанының үйінен тапты. Белгілі болғандай жоғалған бала отбасындағы дау-дамайға байланысты үйінен кетіп қалған» деп атап өтті обылстық Полиция департаментіндегілер.
Қазіргі таңда жоғалып кеткен бала үйіне қайтарылды. Ұлымен аман-есен қауышқан ана баланы іздестіруде шапшаңдықпен әрекет еткен полиция қызметкерлеріне алғысын айтты.
