Бас прокуратура Қостанай қаласында болған «Оружейная палата» дүкеніндегі жарылыс және өрт фактісін тергеп-тексеруді жалғастыруда. Бұл туралы ведомствоның баспасөз қызметі хабарлады.
Тергеу анықтағандай, дүкеннің басшысы оқ-дәрі өткізуге рұқсаты болғандықтан, оқиға қарсаңында Қарағанды облысынан «Сокол» маркалы 40 килограмм оқ-дәріні кейіннен өлшеп орау және сату үшін сатып алған. Бұл оқ-дәрі Қостанай қаласына ауа температурасы 36 градус ыстық болған кезде қауіпті жүктерді тасымалдау ережелерін бұза отырып тасымалданған және жарылыс орын алған дүкеннің жертөле бөлмесіне сақтауға қойылған.
«Сарапшылар жарылыстың себебі оқ-дәрінің тұтануы болды, бұл қирауға және өрттің тұтануына әкеп соқты деген қорытындыға келді. Қазіргі уақытта тергеу кінәлі адамдардың жауаптылық дәрежесін анықтауда» делінген мәліметте.
Еске салсақ, ағымдағы жылғы 3 қыркүйек күні Қостанайдағы қару-жарақ дүкенінде жарылыс болып, арты өртке ұласты. Салдарынан 11 адам зардап шекті, оның 4-еуі қайтыс болды. Олардың барлығы дүкен қызметкерлері. Жарылыстан көршілес орналасқан коммерциялық нысандар мен тұрғын үйлер де зақымданды.
