Түркістан облысындағы Қазығұрт ауданында танысы сеніп тапсырған жылқыларды талан-таражға салған ер адам ұсталды.
Аудандық полиция бөліміне жергілікті тұрғын арызданған. Ер адамның айтуынша, ол танысына бағу үшін 12 бас жылқысын сеніп тапсырған. Алайда малшы ірі қараларды талан-таражға салған. Жәбірленушіге келген шығын көлемі 4 000 000 теңге.
«Аталған жайтты полиция қызметкерлері ҚР ҚК-нің 189-бабы «Сеніп тапсырылған бөтен мүлікті иемденіп алу немесе талан-таражға салу» бойынша тіркеуге алды. Күдікті ер адам анықталды. Ол сеніп тапсырылған бөтеннің малын сатып, ақшасын бас пайдасының қажеттілігі үшін жаратып жіберген. Қазіргі таңда күдіктіге қатысты сотқа дейінгі тергеу амалдары жүргізілуде» деп атап өтті облыстық Полиция департаментіндегілер.
