Түркістан облысы, Төлеби ауданында қойшы жігіт мал иесі сеніп тапсырған жем-шөпті сатып жіберген. Полицейлердің мәліметінше, тәртіп сақшыларына жергілікті тұрғын арызданған. Жәбірленушінің айтуынша, оның жеке мал шаруашылығындағы қоймасынан 6 тонна бидай, 6 тонна арпа мен 750 дана жоңышқаны жұмысшысы сатып жіберген.
«Аталған жайт ҚР ҚК-нің 189-бабы «Сеніп тапсырған бөтен мүлікті иемденіп алу немесе талан таражға салу» бойынша тіркелді. Тәртіп сақшылары хабарлама алысымен тез арада оқиға орнына шығып, тексерудің нәтижесінде күдіктіні жергілікті мекенжайынан анықтады. Қазіргі таңда аталған жайтқа байланысты сотқа дейінгі тергеу амалдары жүргізілуде»,-деді Полиция департаментіндегілер.
Тексеру барысында белгілі болғаны, жәбірленуші ауызша келісім арқылы шаруашылығындағы малға қарау үшін жас жігітті жұмысқа алған. Оған мүлкін сеніп тапсырып, өзі үйіне кеткен. Ал таңертең шаруашылыққа келгенінде қоймадағы сеніп тапсырған мал азығының ұрланғанын көрген. Жәбірленушіге келтірілген шығын көлемі — 3 млн теңгеден астам.
