Алматы қаласында тек түнгі уақытта жорыққа шығып, қылмысқа барып жүрген 20 жасар жігіт ұсталды. Ол өз құрбаны ретінде көшеде жалғыз жүрген бойжеткендерді таңдаған.
Polisia.kz жазуынша, күдікті жас қыздарды тұншықтыру арқылы барлық бағалы заттарын алып кетіп отырған.
«Жедел-іздестіру іс-шаралары барысында Жамбыл облысының тұрғыны ұсталды. Қазіргі уақытта тонау бойынша үш деректі анықтадық. Бір эпизод бейнебақылау камераларына түсіп қалған. Қыздар төтеп бере алмайтын жағдайға жеткен кезде, ол барлық құнды заттарды: ұялы телефондарды, ақшаны алып, қараңғы көшелерде тығылып қалып жүрген. Сондай-ақ, қаскөй жәбірленушіден тартып алған ақшамен дүкенде төлем жасап жатқан дерек те тіркелді. Сотқа дейінгі тергеу амалдары жүргізілуде, – деді Алмалы аудандық Полиция басқармасының бастығы Есен Ысқақов.
Ұсталған күдікті өз кінәсін мойындаған. Полицейлер қазіргі таңда оның осыған ұқсас басқа да қылмыстарға қатысы бар-жоқтығын тексеріп жатыр.
