Үшінші мегаполис әкімдігінде қала әкімі Мұрат Әйтеновтің төрағалығымен жылыту маусымына дайындық бойынша кеңес өтті. Қала басшысына жылыту маусымына дайындық барысы туралы баяндалды, деп хабарлайды Шымкент әкімдігінің баспасөз қызметі.
Оған барлығы дерлік дайын. Мысалы, «3-Энергоорталық» екі турбина мен үш қазандыққа күрделі жөндеу және трансформаторларға ағымдағы жөндеу жүргізілді. Үш қазандықты күрделі жөндеу 82 пайызға, қосалқы жабдықты ағымдағы жөндеу 95 пайызға орындалды, қалған жұмыстар 10 күн ішінде аяқталады.
«Қуатжылуорталық-3″МКК тиесілі 15 қазандықтың 13-і дайын. 17 сорғы станциясының 15-і дайын, екеуіне дайындық жұмыстары жүргізілуде. Жылу желілерінің тозу деңгейін төмендету мақсатында 19,4 шақырым жылу желілеріне жөндеу жүргізілуде, ол 97 пайызға орындалды.
Үшінші мегаполисте 1987 көпқабатты тұрғын үй бар, оның 91% жылу қабылдауға дайындалған. Бүгінгі таңда 484 бюджеттік мекеменің 480 нысаны жылу беру маусымына дайындалды (99%), жұмыстар жалғасуда. Аталған мекемелер жанармай қорымен толық қамтамасыз етілгені атап өтілді.
Қала тұрғындарының көмірге деген қажеттілігі 66 мың тоннаны құрайды, бүгінгі таңда қалаға 100,8 мың тонна көмір тасымалданды, қоймаларда 35 мың тонна көмір қоры бар. Инфрақұрылымдық жүйелердің дайындығы 90% құрайды.
Қала әкімі күрделі жөндеу бойынша аяқталмаған жұмыстардың аяқталуын жеделдетуді, құбырларды жаңғыртудағы кемшіліктерді жоюды, көпқабатты тұрғын үйлердің жылу беру маусымына дайындығы туралы аудан әкімдеріне қосымша баяндауды, маусымға дайындық жұмыстарын қыркүйек айының соңына дейін аяқтауды тапсырды.
Естеріңізге сала кетейік, 2022 жылы Шымкент әкімінің өкіміне сәйкес жылыту маусымы сәуір айында аяқталды. Көктемнің екінші айының бірінші күнінде мегаполисте қазандықтар мен ЖЭО өшірілді. Сәуір айында «Қазгидромет» деректеріне сәйкес Шымкенттегі орташа тәуліктік температура +21 градус деңгейінде болды. Бір жыл бұрын, 2021 жылы жылыту маусымы ұзартылды. Содан кейін Шымкентте жылыту маусымы 15 қазанда басталды. Ол 143 күнге созылды және қала әкімінің бұйрығымен 24 наурызда аяқталуы керек еді, бірақ суық ауа райына байланысты үшінші мегаполис басшысының шешімімен жылыту маусымы алдымен 1 сәуірге дейін ұзартылды, содан кейін тағы төрт күнге ауыстырылды.
